يعني ايه لازم والمفروض ديه وصية ميت لازم تتنفذ
يا اما الحسبه تتغيروكمان القسمه
ايه اللي بيحصل بالظبط مع الناس دية
ما تيجوا نشوف ونعيش مع ابطال مسلسل قسمة علي اتنين والحلقة الثانية يارب تعجبكم
تحيااااتى نهي علي
مسلسل / قسمة على إتنين
قصة وسيناريو وحوار / نهى على طه
الحلقة الثانية
مشهد (1) ليل خارجى / واجهة فيلا كبيرة ذات طراز قديم
البوابة / لافته مكتوب عليها فيلا بدر الدين صدقى
ـــــــــــ قطع ــــــــــــــ
مشهد (2) ليل داخلى / فيلا بدر الدين / الرسبشن
السيدة يسرية الدراملى بملامحها المسنه الكئيبة الحزينة
جالسة داخل مقعدها المتحرك تنظر لأولادها الثلاثة فى صمت وحسرة والمشادة الكلامية بينهما وإلى زوجة إبنها الشابه نادين وهى جالسة على كنبة الأنترية تطالع المشهد فى حيرة وضيق صامت
على واقفا بوجهه الثائر الغاضب أمام أخيه وليد الذى كان يلوح فى الهواء بإستياء وغضب وسارة واقفة بينهما تحاول تهدئة الموقف
على فى غضب :
مش ممكن أقبل بوصيه زى ديه دا وضع مهين ليا ولمراته ولنادين
وبعدين إشمعنى إختارنى أنا ليه ما إختارش جنابك على الأقل إنت خالى لا متجوز ولا بتحب تستقر إنت أحق
وليد فى حدة قوية :
عشان حظى نحس يا على يا بنى أدم إفهم شاهر وضح كل حاجة فى السيدى إللى لسه شايفينه .. مش حيأمن حد على مراته ولا بنه ولا فلوسه غيرك وقصاد دا سايب لك لوحدك تلت التركة ودول مش مليون ولا إتنين لأ دول ملاين وملاين كتيرة قوى
سارة محاولة تلطيف الحوار :
يا على أبيه شاهر الله يرحمه طول عمره وهو نظره للبعيد وتفكيره سابق سنه ودا إللى خلاه يقدر يحافظ على ثروة والده الله يرحمه ويزودها كونه إنه إختارك فدا مش عشان يهينك لأ على العكس لأنك إنت أقرب واحد ليه مش عشان أخوه لأ كمان عشان صفاتكم مشتركة وهو واثق ومتأكد إنك حتحافظ على فلوس خالد وتصون مراته لكن لو رفضت كل حاجة حتضيع التلت وكمان السدس الشرعى نصيب ماما ولا إنت ناسى إنه باع كل حاجة وخبى فلوسه وعشان الفلوس تظهر لازم كلنا نوافق على الوصية
وليد فى نبرة رجاء :
حرام عليك يا على تضيعنا كلنا نادين نفسها عارفة إنت بتحبها قد إيهوعمرك ما حتبص لواحدة غيرها مش كدا يا نادين أرجوكى إتكلمى
على ينظر لنادين والدموع الحبيسة داخل عينيها وفى نبرة شبه مختنقة :
تصبحوا على خير يالا يا نادين نطلع عشان أنا تعبان من السفر
نادين تنهض فى صمت وتصعد سلم الدرج مع على
وليد فى حنق وغضب :
غبى ... أغبى إنسان أنا شفته فى حياتى سارة تنظر لوجه أمها المنكسر وهزة رأسها الحزينة
ـــــــــــ قطع ــــــــــــــــ
مشهد (3) ليل خارجى / شاطىء البحر فى الظلام
ــــــــــــ قطع ـــــــــــــ
مشهد (4)
ليل خارجى / شاطى البحر أمام الفيلا
فراولة جالسة على مقعد بجوار سها
سها فى حالة صدمة وذهول ... غضب وخيبة أمل
سها فى عدم فهم :
ليه يا شاهر عملت كدا أنا أستاهل منك القسوة والمهانة ديه عاوزنى أتجوز أخوك يا إما ماليش ثروة ولا حقوق مش حتجوزه يا شاهر ... مش حتجوز على ولو على رقبتى
على ... على أتجوزه أبدا أبدا
سها تبكى فى إنهيار
فراولة تربت على كتفها وفى نبرة لينة محاولة تهدئتها :
متظلميش المرحوم يا سها حرام هو فعلا حبك ووضحلك فى السيدى ليه خد القرار دا عشان مصلحة بنه إللى إنتى حبيتيه وعاملتيه زى أدم وأكتر وراعيتى ظروفه المريضة ... إنتى عمرك ما طمعتى فى شاهر ولا إنتظرتى منه حاجه وهو قدر دا
شاهر عاوزك تعيشه سعيده إنتى لسه صغيره تربى بنه كأنك أمه وتتجوزى كمان دا حقك فى الحياه
سها فى مرارة العلقم والدموع تنهمر ساخنة :
حقى .... حقى ضاع من زمان قوى يا فراولة من أنا عيلة عمرها ستاشر سنه
إللى عمله شاهر دا إجبار مش إختيار ولا حق
سها فى نبرة إستنكار وحسرة ووجع :
على أتجوز على مش ممكن
فراولة فى قوة وهى تنظر لعينيها وتمسك كتفها وتهزها برفق :
دا المعقول والممكن الوحيد يا سها دا رد على حاجات كتيره قوى
فكرى فى أدم ... أدم مش إبنك لوحدك لأ دا ابنى أنا كمان إنتى خلفتى وأنا ربيت عاوزاه يدوق المر إللى شفناه ويعيش العيشه السوداء إللى عيشناها مش حسمح لك تضيعى حق الولد وتطلعى من المولد بلا حمص زمان ودلوقتى دا يبقى حرام عليكى الفيلا إللى قاعدين فيها المرحوم كان مأجرها لمده سنه والسنه قربت تخلص والشقة إللى على النيل دى بتاعة خالد بيع وشراء والواصى عليه على يعنى مفيش مكان لينا والفلوس زى ما سمعتى وافقتى على الوصيه حتاخديهم على مدار خمس سنين شرط جوازك من على إعتبريها صفقة إيه يعنى ضحى عشان بنك إعقلى يا سها وبلاش الغضب يعميكى
سها تنظر لفراوله والدموع متغروقة كثيفة داخل عينيها تنظر لها نظرة حيرة وشرود وألم
ـــــــــــــــــ قطع ــــــــــــــــــ
مشهد (5) ليل خارجى / فيلا بدر الدين / شرفة حجرة نوم على
على جالسا نصف جلسه على السرير مرتديا بيجامته وبجواره نادين بشعرها المنسدل وقميص نومها الحريرى
نادين تقترب من على وفى نبرة كلها حب وإحترام :
إنت مش عاوز توافق عشانى يعنى بتضحى بكل الملايين دى عشان حبك ليا مش كدا يا على
على ينظر لنادين ويلتقط كفها ويقبله فى حنان قوى وفى نبرة صادقة :
إنتى أغلى حاجة فى حياتى يا نادين
نادين فى نفس النبرة :
وإنت دنيتى كلها أنا أسعد زوجه فى الدنيا لأن جوزها وحبيبها بيحبها الحب دا كله
عشان كدا حبيبى مش عاوزة الغضب وحبك ليا ميخليكش تشوف الصورة كويس
الثروة مش قليلة ووليد معاه حق لما قالك دول ملايين كتيرة وإحنا لو رفضنا نصيبك ونصيب طنط حيروح للسها دى بس إذا وافقت الكل حيستفيد وقبل كل دا حتريح أخوك إللى وصاك وإنت قولتلى إن شاهر عمل عشانك وعشان العيلة دى كتتير
على يطلق تنهيدة طويلة وفى نبرة هادئة لكنها مختنقة :
خلينا نأجل الكلام فى الموضوع دا وقت تانى أنا تعبان يالا ننام
على يرقد على الفراش ونادين تغلق زر الأباجورة وفى نبرة هادئة حانية :
هابى نايت حبيبى
ـــــــــــــــ قطع ـــــــــــــــ
مشهد (6) نهار خارجى / فيلا بدر الدين / البوابة الكبيرة
على يخرج بسيارته ويعبر البوابه الكبيرة وعلامات الجدية على وجهه
ـــــــــــــــ قطع ــــــــــــــ
مشهد (7) نهار خارجى / منطقة المقابر
على واقفا أمام قبر شاهر يقرأ الفاتحة
علي ينتهى من القراءة وينظر ناحية المقبرة وإسم شاهر
محدثا نفسه فى نبرة حزن عميقة :
ليه .. يا شاهر شيلتنى أمانه الجبال نفسها تتعب من حملها
أنا عمرى ما كنت حقصر فى حق خالد أبدا لأنه بن أخويا وإنت مش أى أخ يا بن أمى وعن دون الستات دى كلها متختارش إلا سها ...... سها يا شاهر ليه العذاب دا بس
حقولك إيه الله يرحمك أنا حنفذ وصيتك يا شاهر عشان أريحك دا حقك عليا وعشان أريح الجميع محدش بيهرب من القدر ولا المكتوب ليه
ـــــــــــــ قطع ــــــــــــــــ
إلى اللقاء فى الحلقة القادمة إن شاء الله
يتبع ................
ليست هناك تعليقات:
إرسال تعليق