يا موج البحر
يابحر أنا جايلك
أبوح لك بأسراري
أفضفض علي شطك
أشكيلك همي وسوء حالي
حبيبي وبحبه
جاني لغاية باب داري
شافني علي رملك
وأنا بأداري حسني وجمالي
كلم أبويا وأخويا
وبقينا اسرة بنظرة وأهالي
دفع مهري وراح
خطبني من عمي
و أخدني من حضن أمي وخالي
زماننا الحلو مر و ذهب
وعيشناه حقيقة أجمل من الخيالي
بحار عايم ف بحرك
سهران نهار وليالي
يقلب ف رزقه
مركبي راكب علي موجك العالي
بعد عني وبيوحشني
وأنا طالبة قربه أنوله من تاني
صياد بشبكة
شبك قلبي وشال همي وشغل بالي
مشتقاله يا موج
وأنا اللي كان قلبي فاضي و خالي
وعدني ووعده
كان لحياتي وروحي ودلالي
صورته ف عينيا
بيشبك إيديه بإيديا
بيقدم لي لآلئ بتلالي
لولي لرقبتي
ولرجلي صدفة خلخال
يا موجة شقية معدية
بتداعبي مراكبي عليا غالي
إبقي حني عليه شوية
وانتي بتجري
لأجل ما يحدف وببراعة يجدف
إهدي عليه و بهدوء عدي
صوتي ياموج ياتري
وصلك وأنت سامعني؟
بنادي عليه اصله
حلف وما رضيش يودعني
فضفض معايا
ياموج إنت اللي فاهمني؟
وصل غرامي
للي علي بالي وواحشني
وفكره يا موج إني
منتظراه ببسمته يفرحني
يا موج البحر
ياتري إنت سامعني؟
إياك تحرمني أو بهدوئك تلاوعني
بقالي ساعات علي شطك
وروحي معاه و فارقتني
حبيبي بحبه وهو برده حاببني
ووعده لروحي إن عمره ما حايسبني
أنا حياته وهو شمسي ونوري و ضللي
يانسمة هوا سمعتيه قال إنه حيفوتني
يا نجمة ف العالي بصة عليا ومرقباني
دليه علي شوقي و عرفيه لعنواني
لبعده زادت لهفتي
وقدر عليا زماني وبكاني
ياتري ياموجة لسة سمعاني؟
البحر شمتان فيا
وضحكته عليا رانة ف وداني
ياترى ياموجة لسة سمعاني؟؟؟ ؟؟؟؟؟
دموعي علي خدي سالت
وانتي لسة عصياني؟؟؟ ؟؟؟؟؟؟؟؟
ياترى ياموجة....... إنتي لسة مخصماني؟؟؟
سمعاني يا موجة سمعااااني؟؟؟ ؟؟؟
أصلي ياموجة ما زهقتش
ونفسي أعيد الكلام من تااااني!!!!!!!
تاااااني!!!
ياتري ياموجة لسة فهماني؟؟؟ ؟؟
بقلمي عزة حزين
Azza Hozayen
ليست هناك تعليقات:
إرسال تعليق