قصيدتي ..( مجدافك صفيح )
بقلمي .. وأدائي
...................................
" مجدافك صفيح "
لما تبدأ رحلتك ..
حاسب
على خطوتك ..
خطوتك مركبك ..
وبحرك تباريح
شديد الريح ..
ومجدافك صفيح ..
وقلبك
الغرقان وجع
مستني موت ..
أو بطن حوت
حتى الودع
قال الجدع ..
محتاج شراع
والشراع
ف النوا ضاع ..
سابك وراح
مليان جراح ..
زي الصديق
شافك غريق ..
لا بل ريقك ..
ولا مد إيده
يشد إيدك ..
لو كان صديق
إزاي يبيعك ..
دا الصديق
ف الرحلة ضهر ..
يشيل همومك
وبعدي بيها
ألف بحر ..
ويكون شراع
يصد عنك
أعتى ريح ..
لو جريح
يقاسمك الجرح
بصحيح ..
الصديق
لو كان صديق ..
هيكون وفي
ويكون جدع ..
ويداوي قلبك
م الوجع ..
ويداوي قلبك م الوجع ..
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية
معوض حلمي شاعر عامية
ليست هناك تعليقات:
إرسال تعليق