بياع كبريت...
بياع كبريت قاصر معتر
عمره خمس سنين مش اكتر
قلت يا ريت ما جابتو امه
كانت جريمة اهون واستر
مرق من جنبي وردد وقال
عمو بدك كبريت لهالسيجار؟
زأرتو زأرة اسد متعال
وقلتلو روح من هون يا أزعر
جاي تنرفزني انا وع الكاس
بالفعل لا مربى ولا إحساس
راح الطفل مكسور حاني الراس
ضحكت ورفاقي الكاس والمعشر
ولما رفهت عني وعن الاصحاب
دفعت الفاتورة لاغلا ثمن من دون حساب
والمسكين حد الباب بقي يسهر
تيابو عتيقة مسرجة تسريج
ما بين شحم.. ولحم...وفراريج
أخد بتنشق الريحة ويتحسر
وامه الحزينة ناطرة رجوعو
تتخدر جوعها وجوعو
وتحاسبو وتلملم دموعو
عن ورد خدو الذابل الاصفر
ولما انا عالبيت جيت
عيوني ما غفيت وضليت للصبح اسهر
فكر شو بإيدي جنيت
تذكرت طفل الكبريت وكيف قلبي تجبر
وقلت عايد هالطفل ربي اهتديت
وبلشت من لحظتها صلي واستغفر
وصرخت بصوت عالي وصرت بالصوت اجهر
ربي ليش الظلم بهالدني وانت اخبر
وين العدل ..وين رحمتنا نحنا البشر
عالم حرقها الجوع تحت الشمس
وعالم بتحرق مال ل تسكر
....بقلمي علا فياض سبيتي
ليست هناك تعليقات:
إرسال تعليق