قصيدة غضب ام--------
-------
شوف خطوطى اللى ف ايديك
شوف ملامحى اللى ف عينيك
يابن بطنى
فى الطفوله اخدت رطنى
خدت حتى حروف الكلام
يوم ماجيت ماعرفت انام
لما شوفتك يوم حابيت
خدت روح قلبى رضيت
------
انت يابنى كنت بابنى
فيك رجوله
كل حته فيك عموله
------
كنت تكبر وانا اقِل
كنت ابنى واحلى خِل
لما ورد البدر بان
كل ركن ف جسمى سل
-----
كل دا راضيه وبادعى
تبقى ملو الدنيا ديه
نفسى افرح يوم بزرعى
دانت روحى ونور عنيه
------
شوف زمان ايام حنانك
كنت بابدر ليك ورود
كنت بزرع ليك امانك
عود امل م الجنه عود
-----
كنت يوم لورا لحياتك
كنت انت الحبهان
لما ندى ف يوم نباتك
فجأه كل الحب هان
----
حطوا فى قلبك حجر
كنت اقوى م الصخر
الناس تشوف تقول قمر
ابكى ياقلبى اللى اتقهر
-----
انت فيك القلب مات
سيبت قطر الرحمه فات
الضمير سابك وسافر
انت يكفاك السكات
---
شوفت ياما فيك قرف
ياه ه ه بتعايرنى بالخرف
عمرى يابنى دعيت عليك
لكن دا دين يابنى وسلف
----
قولى يابنى قتلت كام
انت لو بتصيد حمام
كان زمانه صعب عليك
قولى ازاى تعرف تنام
داحنا يابنى تعبنا لَمْ
شوف ايديك مليانه دم
----ِ
بص يابنى انت ابنى
بس يعنى فرع مال
ياريت تسيبنى
فى اللى نابنى
م القساوه دمعى سال
-------
فيه عمل وفيه حساب
بشرى يابنى للى تاب
كنت فرسى وكنت ضرسى
ليه بقيت م القسوه ناب
ليست هناك تعليقات:
إرسال تعليق