عن الدايرة اللى ساكنها ورافضة تلف
عن الشوق اللي مالكني
وعن جرحي اللى مش بيخف
عن الأيام وقسوتها
وعن عمري اللي عدى يلف
عن المااضى وأيامنا
وعن حاضر بيقتل فينا أحلامنا
وكأنه بير ومش بيجف
عن ربطي ف الساقية
وعيون كتير باكية
وعن دمعي اللي ما بينشف
وعن قلبىي اللي من طيبته
ازاز بيشف
وعن حلمي على الأيام
وعمري ما أقولها اف
وعن أشياء كانت أملي
وانشالت مني فوق الرف
وعن بنوتة سهرانة وحيرانة
وكان نفسها يوم تنزف
وعن حبيبتي اللي تعباني
وعن قلبي اللى بيعاني
وعن شرب المر بكعاني
ولولا الشوق لعنوانها
ما دار ولا لف
وعن عزفي على النايات
ولولاها ما كنت أعزف
عن الدايرة اللى ساكنها ورافضة تلف
وعن مسكين فنى عمره
بنى قبره
وحط على بابه فرع من السعف
وعن مسطول ومن همه
وقع ع الارض
ما لاقي يا عيني طريق مسعف
وعن خيانة صحاب أندال
ومن صحبتهم
.لا.......... أنا أشرف
وعن أخطائهم وأوزارهم
لساني عف
وعن ملايكة ف شكل أحباب
ولولاهم ما كنت أعرف
أعيش أيامي وسنيني
وأدوب وأحتار ف تكويني
وحبس الدمع من عيني
ولوعة فراقهم بيكويني
يخليني
أغيب م الصف .......
ودي الدايرة اللى ساكنها ورافضة تلف
#صبرى جاب الله
ليست هناك تعليقات:
إرسال تعليق