حكاية أب غزاوي
من بين كل المداين يا غزة فيكى جرح.
الظلم بقي باين ولا يعرف الحياد
قاطف ورد الجناين قدام كل العباد
وانت واقفه ابيه رافع راس البلاد
و رغم ما فيك من الم ومن حداد
بطوبة وبندقية فريسة وراء صياد
حاملة هم العروبة ومحافظة ع الامجاد
وتحت قصف المدافع واكوام الرماد
طفل مولود بيكبر متربي على الشهادة
رافع ايده وكبر الموت فداكي عبادة
ايه فى الدنيا يساوى لحظة فراق الشهيد
ومين على الصبر ناوي ابنه يبات بعيد
سمعتوا كتير حكاوى وهتسمعوا مني
انا للحزن مش غاوى لكن غصب عني
حكاية أب غزاوي . كان كف ولده متحنى
قال ... قبل ما يودعني ضميته وحضني
انا حضني لسه دافي من ضمتك يابني
ومكنتش عامل حسابي تروح كده وتسيبني
الحمل كسر كتافي و الحزن بعدك صاحبني
الدمع مر صافى وحنيني ليك غالبني
كفنك علم وعلامة وع كتفك كاتبني
فوق شفايفك ابتسامه وكانك بتعاتبني
انا ايوة ربيتك ع الشهامه قبل ما تزرع وتبنى
علمتك معنى الكرامه وانا اللى يصبني. يصبني
يا عريس يوم القيامة بالاسم طالبني
تتمنى لى السلامه ومين غيرك يا ابني
دفعت تمن الخيانة وانا قلبي تاعبني
في كل ركن وخانة صورتك تداعبني
واحشني بالامانة وربنا يحاسبني
بقلم / احمد محمد الشريف
ليست هناك تعليقات:
إرسال تعليق