ولاد الأصول
أنا الأول على كل أقراني
لكني راجل جد و بسيط
من نظرة عين سهل تقراني
عمري ما كنت لئيم وحويط
ولا إحساسي كان براني
ولا فرق معايا مال ولا سيط
ولا مرة كان فى حسباني
شهم و على الرجولة شبيت
من يومي كدا أبويا رباني
أصل الشهامة نبع غويط
سنين العمر منه كتير سقياني
أوعى يغرك عويل شبع تنطيط
شبه القرود رقص على الحيط
لا غير و لا بدل شكل البيت
وساعة مايقولوا فين الأصيل
بالتفصيل دلهم على عنواني
عارف نفسه ابن المساخيط
عامل مظلوم وهو الجاني
أصل السمعه مش كلام تفريط
ولا مقابلة و بعدها تنساني
دى سكة مرسومة بالتخطيط
مش مجاملة وحبة أغاني
سكة قطر قالوا عليها شريط
لجل يمد خطوته مش حد تاني
واللي يفكر في مسابقته عبيط
خسران ولابد هيرجعه وراني
إياك تقول عليا مغرور ما تربيت
أنا بعيب ع الدنيا اللي معانداني
اللي خلت العويل شبع تنطيط
ونازل ف ولاد الأصول تخبيط
وعامله قال مش سامعاني
كلامي كتبته عليها بالتظبيط
يمكن تعيد حسابها تاني
بقلمي /
أحمد محمد الشريف
ليست هناك تعليقات:
إرسال تعليق