ساعات الخوف بيرسم ع الوشوش صورة
بألوان باهتة تزعجنا وفي الكادر عيون عورة
لا بتعبر عن الإحساس مجرد رسمة بس خلاص
تشوفها تقول دي كل الناس حالتها حالة ميسورة
وده الظاهر لكن جوه القلوب دنيا وكلمة لسه محشورة
مسير الكل ينطقها ويكتبها على القورة
مسير الكبت هيفضغض ويكسب بيها كام فورة
ساعتها الحرف هيعبر ويكتب غنوة ويصبر
في ناس عاشت بتتكدر حياتها بس فزورة
في ناس الجوع بيعصرها وملعوب بيهم الكورة
ويرسم رسمة من تاني بريشة حد بيعاني
تكون فيها الوشوش واضحة وعايشة عيشة مستورة
تكون فيها العيون سودا ومش لانسس وع الموضة
وتبقى الكفة موزونة ما بين الحوت وعصفورة
ويبقى الحق متزين على رأس الجميع بين
ويبقى العدل عنوانه محدش عينه مكسورة
واي نفوذ بيتكسر لا يتكبر ولا يقدر
يزور في الحقوق اكتر ويعمل نفسه اسطورة
ويبقى الظلم متكفن وريحته تفوح ويتعفن
ويبقى عبرة للفاجر فضايحه تبقى منشورة
ونلمح صبح بيشقشق وبلبل جي بيزقزق
وشمس طالعة تتحقق ولابسة لبس سنيورة
تدفي الكل وتغني تحلي الرمش والنني
تدافع ع اللي مستني يشوفها وهي غندورة
وندعي الهم ينسانا وننسى اللي غمانا
وتدعي ع اللي خلانا نشوف في الحر شبورة
وتعلى الضحكة من تاني لا فينا جبان ولا اناني
ولا مخلوق يقول ياني عشان ليه بنت مقهورة
ومش عارف يجهزها ولا عارف يجوزها
ولسه هي وعريسها بيمشوا في سكة مجهولة
وياما الدنيا بتعلم وياما كتير بيتألم
وياما الحزن بيكلم قلوب في الفرح مهجورة
طارق شامخ عبد الجواد
ليست هناك تعليقات:
إرسال تعليق