أتوضى بعرقك
اتوضى بعرقك وأنا واثق
عرقك دا حلال
واتغنى بشرفك وأنا عارف
شر فك موال
وأحلف ع الطينة اللي في إيدك
تشهدلك يغفرلك سيدك
دا الدم الساير في وريدك
على صبرك بيقول أمثال
وعيونك مخنوقة بدمعة
مع إنك يمكن مش سامعة
أنا جي بقدم ميت شمعة
مش لاقي كلام تاني يتقال
وأحلف ع النعمة إنك نعمة
الناس شيفاكي ومش فاهمة
والستر حداكي يادوب هدمة
مغزولة بشقى ربت أجيال
على وشك مرسومة سنينك
والإيد مسنودة على جبينك
في القلب أذان يسلم دينك
الله يعينك على سوء الحال
اتوضى بعرقك وأنا واثق
عرقك دا حلال
واتغني بشرفك وانا عارف
شرفك موال
طارق شامخ عبد الجواد
من ديوان حصالة الوجع
ليست هناك تعليقات:
إرسال تعليق