الغربة
إوعاك تصدق إن الغربة بتبني بيوت
دا كلام كدب و زيف كلام مغلوط
خليك مخدوع ب وهم ولسان غشاش
بس متنساش عمرك راح ببلاش
إنت عبد وتمنك من الأول مقبوض
هنا زي هناك و الفرق حدود
بلدك بيعاك برخيص ومقابل محدود
هتكون الغربة شرياك وعليك هتجود
وإنت فاكرها شطاره وإنك واد موعود
وناس تستنى و تحلم بيوم متعود
و أنت تعافر سنين متكتف بقيود
أمك تنادي عليك كل قيام و قعود
تصلي و تدعي لك فى كل سجود
على طول جايبه فى سيرتك و تقول
يا واد أرجع ماله المش وماله الفول
عاود بس هكلملك حد يكون مسؤول
و أكيد هندور يا واد على تاني حلول
بس أمانة عليك يابني لتعود
وأنت تثبتها ب أى كلام و بكل برود
وتقول. .الصحه يامي واكلها الدود
أنا أتعودت ع الغربة و الليل و سواده
بروح للشقى قبل ما يجيني ف ميعاده
أنا الزرع اللي أكلوه قبل وقت حصاده
أنا الورد اللي قطفوه قبل متشد أعواده
أنا الواد اللي حاربوه بالحد فى زاده
أنا الغريب سوا بره أو حتى فى بلاده
أحلامي زى طير فى السما مطلوق
ونفسي أخر حاجة أفكر فيها بسؤالي
أشوف الفرحة فى عيون كل مخلوق
أنام بس علشان أحلم بيها جيالي
كفاية عليا الحلم وعارفك يامي دعيالي
أتعودت ع الظلم بشوفه كل ساعه قبالي
ناس تجري و تتكفي وتهرب م الدوريه
تنام ولا حتى تتعشى و بطونها مطويه
البرد قارصهم و من شدته الجته ملويه
الخوف ساكنهم للعسكر يدق عليهم الباب
لازم هيسأل ويستكتر يسمع حتى جواب
على طول يسحبهم ولا يدور ع أسباب
الكل عارف كيف بتكون معاملة الأغراب
و هناك الضيف مش محتاج توصيه
الكل يجامل شوفوا له كام ألف قضية
وبدال مخالف تهرب ليه م ( التسوية )
فاكرها يا............. شاطر خبزه طريه
مفيش غيرالترحيل أبعتوا هاتوا الكفيل
رابطه حطته بعقاله الخير ع إيدك جاله
يتنعم فيه هو و حريماته و عياله
وأنت يرميلك فتافيت من فكة بقياله
أصلك غاوي طنطيت أنت هتشاركه ف ماله
تطلع من المخفر ترجع تاني تعيد الكره
تستغفر ربك مره و تحمده كام ألف مره
تحمد ربك إنك مروحتش (متسفر)من بره
يلا.. طلعت خلاص براءة و أيدك حره
وان كنت يا غريب معرفتش تهمتك أيه
وليه جروك من سكنك و خدوك ليه
تعالى فيه نصيحه نفسي اقولها لك
مهما الجور و الظلم فى بلادك طالك
بلادك اولى بيك بردو هى اللي بقيالك
أن كان الخير الآن مش ليك بكرة يكون لعيالك
بقلمي /
أحمد محمد الشريف
ليست هناك تعليقات:
إرسال تعليق